Grut Hermana

Grut Hermana wie in stins yn it doarp Minnertsgea yn de gemeente It Bilt oan de hjoeddeiske Hermanawei, ten noardeasten fan de tsjerke op it steed dêr't no in pleats stiet. Hjir hat it laach Hermana ieuwen lang wenne.

Neffens leginden bestie de stins al foar de 8e ieu en waard it werboud yn 807 neidat it ferwoaste wêze soe troch in oerstreaming. Oft dit werklik sa is wurdt betwifele, mar de stins hat al in lange skiednis. De 9e ieuske Fryske potestaat Hessel Hermana soe der ek wenne hawwe. It laach Hermana hat ek mei oare Fryske edelen fochten yn de krústochten en soe ek meidien hawwe oan de krústochten. De earste konkrete feiten oer de family en state binne fan de 14e ieu. Yn de 16e ieu waard troch Frans fan Hermana Lyts Hermana boud, wêrnei't de stins tenei mei oantsjutten waard as 'Grut Hermana'. De lête Hermana dy't it hûs bewenne wie Jan Wibrens Hermana, († 1591). Om 1700 hie Tjalling Homme fan Camstra Lyts en Grut Hermana yn eigendom en liet om dy tiid Grut Hermana ôfbrekke. It bestie doe út in stins mei in grêft en singel deromhinne en in pleats ten suden dêrfan. De pleats dy't derby stie is nei alle gedachten inkele desennia letter ôfbrutsen, omdat yn in stien yn de skuorre fan de hjoeddeiske pleats de wurden "Groot Hermana Staate en Boere Huis en Schuir Nieuw Geboud en verset in den Jaare 1772" ynmitsele steane. It omgrêfte terrein dêr't de stins op stie waard oant fier yn de 20e ieu It Stinzelân neamd. De grêft waard letter foar in part tichtsmiten foar de bou fan in nijbouwyk. It ienige dat no och oer is fan de state is in stik grêft foar de hjoeddeiske pleats oan de kant fan de strjitte.

Boarnen, noaten en referinsjes

Boarnen, noaten en/as referinsjes:

Beschrijvinge van de Heerlyckheydt van Frieslandt, atlas van de Heerlijkheid Friesland uit 1664 Tegenwoordige staat van Friesland Stinzen yn Fryslân